«Иахьа қәҿиарала ихырқәшоуп Аҧсуа драматә театр 95-тәи атеатртә сезон.
С. Ҷанба ихьӡ зху Аҧсуа ҳәынҭқарратә драматә театр аҭоурых ду змоу культуратә хәышҭаароуп. Араҟа аус руан еицырдыруа аҧсуа сцена азҟазацәа, иахьагьы уи аус иацҵо, ҧхьаҟа инаго шәаауеит.
Гәахәара дууп, аҧсуа театр ахь имҩахыҵуа ахәаҧшцәа рхыҧхьаӡара иахьацлаз, иҭбаахеит атеатр арепертуар, иҳаракхеит аспектакльқәа рхаҭабзиара. Иахьа аҧсуа театр аихьӡара бзиақәа аанарҧшуеит Аҧсны еиҧш, уи анҭыҵгьы. Имаҷымкәан шәхы алашәырхәхьеит жәларбжьаратәи атеатртә фестивальқәа, уи, жәаҳәарада, ҳкультура, ҳбызшәа аиқәырхараҟны лагала дууп. Шәара ихшәырқәшеит 95-тәи атеатртә сезон, уи иалагӡаны шәрепертуар ақәыргыламҭа ҿыцқәа рыла акырӡа ибеиахеит, насгьы атеатр иадҳәалоу егьырҭ аусмҩаҧгатәқәагьы маҷмызт. Ҳахыҽхәаны иаҳҳәартә ҳалшоит, сынтәа аҧсуа театр ишҭнажьыз 9 спектакльк, уи еихьӡара дууп ҳмилаҭтә культуразын.
Аҧсны Акультура Аминистрра ахьӡала ишәыдысныҳәалоит. Наџь-натә аахыс аҧсуа театр иамаз атрадициа шьахәқәа рынагӡареи реихаҳареи рҟны ақәҿиарақәа шәымазааит. Шәнапы злаку аҟазара аус аҟны аихьӡара бзиақәа шәҧеиҧшзааит.
Уахгьы-ҽынгьы зусура еилашуа, алҵшәа бзиақәа аазырҧшуа Аҧсуа ҳәынҭқарратә драматә театр шәагымзааит аҧсуа доуҳатә культура, шәагымзааит Аҧсынра!»
