Мрагыларахьтәи афронт аибашьцәа заа еиқәыршәаз арратә план аҳәаақәа ирҭагӡаны, ажәыларақәа ирҿын Очамчыра араион ақыҭақәа Араду, Цагьара, Ахалдаба рхы рақәиҭтәразы. Даҽа гәыҧк иалаз аибашьцәа рымҩа хан Кәыдры аӡиас ацҳахь.
Цәыббрамза 17 рзы аҕа алада-гәымсҭатәи ацҳаҿы ипозициақәа ҧыххаа иқәырҵеит. Ажәылара иацҵо, аҧсуа архәҭақәа Гречко идача аҟынӡа инаӡеит.
Ахы иақәиҭтәын Бырцха. Рхы иақәиҭтәын убасгьы аиланхарҭатә ҭыҧқәа Лекухонеи Аҩадатәи Кьалашәыри. Убри аҽныҵәҟьа Урыстәыла атәылахьчара аминистр Павел Грачиов диҧылеит Владислав Арӡынба. Аиҿцәажәарақәа цон аҧсуаа рганахьала ажәылара аанкыларазы.
